SANG WARIH

 doh  -  maewu jung lakumu

nrabas , kabentus watu lan samubarang kang ana ngarep lakumu

babak bundhas – tatu arang kranjang , menawa pana paningalku

mirsani kasunyatan kang sinandhang dening ragamu

doh  -  maewu jung laku darmamu , sayekti

anyebar gawan dayamu , handayani urip ing bumi iki

run – tumurun tumeka saiki

Sang Warih , sira ana lan tetep ana , wiwit sira cinipta dadi

doh  -  maewu jung laku darmamu , sayekti

anjiwit - anjimpit - anjumputi rereget , sesungker , sukertane bumi

kang sira liwati , tumuli

kagawa tumuju segara - samudra kang tanpa tepi

Kanthi dayane Surya , lamun katarima

ing raga pinilih sira bisa rucat raga , nuli alenggah hawa

ndedel dadi mega  , ngantariksa katerak ing samirana

ing titi wanci , sira rawuh bali ing bumi netepi darma

Angasta gawan resik , anyakrawati mbahudhendha

bali nyenyuci bumi , paring berkah lan urip sagunge titah

nora emban cindhe - emban siladan

datan milih  remong batik - lurik - utawi - plekat

Yogyakarta , 27- 05 - 2010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)