RAMA REGHAWA

Hawa Dewi Regu , Prameswari Ayodyapala Nagri

Jejibahan mengayu bawana , Sang Wisnu Bathara

manunggal sajiwa  lenggah maraga ing raga sejati

Sri Bethara Rama Raghawa , caritane

Raga – hawa – sesanggeman  bebarengan nyawiji

Anyirep dayane hawa , adi hawane sang Wisrawa resi

resi mumpuni , bentus ing kawruh , emane tan kuat ing godha lan cobi

Godha lan coba kang lenggah ing raga kenya sulistiya , Dewi Sukesi

Adi hawa sang resi , ngrembaka ing raga raja tega  Dasamuka

Raga kang kaileni getih alasan  ‘Rahwana’ , anyebar hawa angkara

mrana-mrana , ngambra-ambra  ngemperi jagad ..Jagade sapa? , Jagade manungsa , apa ing Jagad Wayang Purwa kewala?

Ngambra-ambra , Sang Angkara sedya ngemperi jagad

Jagad pakeliran Ringgit  Purwa lan Jagade manungsa sanyata

Wayang Purwa   , Kagunan Budaya Bangsa kang banget miguna

aparing suka lan sarana  jalma  ngilo kaca - angleluhur jiwa

Yogyakarta ,  02 Juni 2010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)