LARAS lan HAWA

Trihawa : Rama Reg(u)hawa  ,  Pand(u)hawa , Kur(uh)awa

babon tuk-sumbere carita kang ginelar lan kababar

ing pakeliran ringgit purwa , kairing trilaras swarane gangsa

larase jalma ngilo ing kaca , laras  wujud sejati lan wewayanganira

Pindha jalma ngilo ing kaca , mulat sarira - wani angrasa

Rasa sir andhudhah piwucal  lungit lan werit

siningit piningit ing  ringgit  ‘sarine  anggit’  

mrabawa  lelakon , kang tumuli  ana lakon , lan cinarita ,

nem - sanga – lan - manyura , tri laras pinathet anguripi rasa ,

 jumbuh sipat lan tatarane yuswa lan jiwa

Bayi-bocah  lan  mudha-tumaruna pinathet  laras ing nem lan sanga

Patet manyura  merbawa rasa menep ing pungkasane carita

Jalma samya ngilo ing kaca  ringgit purwa

Golek manyura , kaparaga andhisiki tanceping kayon

asung sasmita golekana makna , nuli goleka guna lan gawan

sadurunge tancep pupuse kekajengan 

datan getun keduwung ing tembe-kanane , karana purnane lelakon 

Yogyakarta , 30 Mei 2010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)