PULASAN

Alim- alim pulasan , njaba putih ing njero kuning sayektinipun

wadon nir wadonira , prawira nir ing ksatriyanipun

becik sethitik , ala saara-ara

cetha , ngegla tinarbuka ing wanci punika

Pager gung , Pangembat Luhur

luhur ing palenggahan lan agung ing sesanggemanira

sanyata sami selak lan nyelaki prasetyanira

ing ngarsa , ambangun teja suwerna

ing madya , angraket mitra saiyeg alaku cidra

tut wuri , ndayani lan angayomi ‘laku nguras bandha negara’

Becik sethithik , nadyan sethithik ana lan tetep ana

ra ana peteng kang bisa anyirep pepadhang

padhang kang anggelak peteng .. prayogane samya.

eling menawa lali – nepsu – lan – apes dunung ing manungsa

Petenge ati .. mbok menawa lali lan nepsu kuncara kang amarbawa

lan apes kang lagi nekani , nuli kawiyak sagunge wewadi nistha

nDilalah Kersaning Allah ,sabegja-begjane kang lali luwih begja

kang eling lan waspada

Yogyakarta , 01072010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)