LELABUHANMU

Tanpa lelabuhanmu , tanpa daya Raga Sejati iki tumuli mati

Sira dadi sarana wigati 

saengga sang aji  Sari-sari Bumi

bisa anerus mili , ing wit  Raga Sejati

Tumeka ing godhong , Sari Bumi karacik  kapanggang

kapanggang dening dayane tawang , Nur lan Cahya  sang

srengenge , rembulan , lan para lintang

Sari Bumi lan Sari Angkasa guyub nyawiji

Sarine alam , kang sayekti daya Adikodrati

kang anguripi uripmu priyangga , nguripi sato para

lan manungsa kadang-kadangmu nunggal hawa

ngrawit – siningit  ing  bantala tinutup lemah , tan kasat ing netra

rina lan ratri , sira  ‘para oyot’   dhatan kendhat alaku darma

aparing daya Raga Sejati murih kuat makarya

njaga  tetep santosa ,  ora ambruk katerak ing coba lan prahara

  

Yogyakarta , 25 - 05 - 2010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)