KEMBAR KEMANIKAN

Nyleneh seje karo liyane , ora lumrah panyuwunane

Kepara nora ana tunggale , ing caritane

Pamundhutan kang abot sangga , sanggan , lan  sanggemane

Nyuwun anitih lan anitihi Lembu Andhini , titihan suci lan singgasana

Sang Hyang Manik Maya , Reratu dewa durandara tridasa watak nawa

lumantar keng ibu , kang lagi ngidham kawoworan

Witeng lan Tangsen , Pusaka Asma kang sinandhang

kembar kemanikan wuragil Pandhu putra

Ksatria – Narendra pangembat praja Kraton Hastinapura

Babad  Alas wingit Wanamarta , Kraton Alus Indraparahasta tinarbuka

Witeng  – Nang Kula  ,  manunggal sajiwa ana aku  ’nangkula‘

Tangsen – Sa Dewa   ,  jumbuh manunggal nyawiji   ’sadewa’

Tangkep wadhah lan isi , nyantosani raga lan jiwa

Yogyakarta , 30- 05 - 2010

(Gurit  punika sampun kapacak (kamuat) wonten ing Majalah Basa Jawa Djaka Lodang Yogyakarta)