AYANG - AYANG

Aku ngagem busana warna abang

katon ireng ayang-ayangku

batik – lurik agemanku

uga ireng ayang-ayangku ,

sarwa ireng warnane ayang-ayang

aku mangiwa , mangiwa uga ayang-ayangku

Ayang-ayang  , sira ana lan dumadi

Menawa tuk pepadhang , ayang-ayang , lan wujud sejati

 nyawiji ing garis maya , kang sejatine ana

Garis maya kang momot sunar - cahya - lan - daya

garis maya kang momot ’nur lan cahya’

kang kaserot , kaemot lan kamot ing wujud sejati

Lamun tuk pepadhang sirna

sira , ayang-ayang datan ana - ilang musna

lan menawa wujud sejati ora ana

sira , ayang-ayang uga ora ana

anamu  gumantung ing ’wujud sejati lan sumber pepadhang’

embuh masa bodhoa , aku ora perlu nggraita !

aaaaah ……..   mosok iya ……….

Iku , gegambaran maya  ’isi-wadah-papan’

GUSTI  ……..  GUSTI-Gusti  ……  Gusti-Kawula

manunggal ing nyawiji , padha-padha merbawani

Gusti butuh kawula lan kawula tanpa Gusti embuh apa kang dumadi

                

MAGUWOHARJO-060209